Bwrdd o Ymddiriedolwyr

Helen Mary Jones

Cadeirydd

Mae Helen wedi dangos ei hymroddiad i wella bywydau plant Cymru drwy gydol ei gyrfa. O 1982-86, bu’n addysgu disgyblion ag anghenion dysgu ychwanegol, ac yn ddiweddarach ymgymerodd â rolau mewn gwaith ieuenctid a chymunedol. Ym 1999, ymunodd â’r Cynulliad Cenedlaethol, a rhwng 2007-2011, Helen oedd cadeirydd y Pwyllgor Plant a Phobl Ifanc. Bu’n arwain y gwaith o graffu ar y broses sy’n arwain at Fesur Hawliau Plant a Phobl Ifanc 2011. Rhwng 2011-2017, Helen oedd Prif Weithredwr Youth Cymru, a llwyddodd i lobïo Llywodraeth Cymru i adfer cyllid craidd i sefydliadau gwirfoddol gwaith ieuenctid cenedlaethol. Cyflwynodd ar hawliau plant a phobl ifanc yng Nghymru ym mhrifysgolion Houston ac Austin yn 2014, a Harvard yn 2016. Rhwng 2011 a 2013, penodwyd Helen i Fwrdd Ymyrraeth Gweinidogol Llywodraeth Cymru gyda’r dasg o herio darpariaeth diogelu, ac fe’i penodwyd yn ddiweddarach. penodi i weithgor sy'n adolygu'r arolygiad o ofal ac addysg plentyndod cynnar. Roedd Helen yn aelod o Fwrdd Arsyllfa Cymru ar Hawliau Dynol Plant a Phobl Ifanc (2012-2017). Rhwng 2018 – 2021, roedd Helen yn Aelod o’r Senedd, ac yn Gyd-Gadeirydd y Grwpiau Trawsbleidiol ar Blant, a Phlant a Phobl Ifanc sy’n Derbyn Gofal.

Jackie Murphy

Is-Gadeirydd

Mae Jackie Murphy yn weithiwr cymdeithasol cymwysedig sydd â gradd Meistr mewn Gweinyddiaeth Fusnes. Bu’n Brif Swyddog Gweithredol Tros Gynnal, sef TGP Cymru bellach, ers 2013. Mae Jackie yn Gadeirydd Pwyllgor Ymgynghorol CAFCASS Cymru a bu’n aelod o Grŵp Gorchwyl a Gorffen Eiriolaeth Genedlaethol Llywodraeth Cymru, yn Gadeirydd Swyddogion ac Eiriolwyr Hawliau Plant (CROA) ac yn Aelod Anweithredol o Fwrdd Iechyd Lleol Rhondda Cynon Taf.

Suman Bhogal

Trysorydd

Mae Suman Bhogal yn gyfrifydd siartredig llawn ac yn aelod o CIMA (Sefydliad Siartredig y Cyfrifwyr Rheoli). Bu’n gweithio i Barnardo’s fel Rheolwr Busnes Cyllid ers 2015.

Bu Suman yn byw yn Sydney am chwe blynedd ac yn gweithio i Rwydwaith Teledu fel Rheolwr Cyllid Masnachol. Cyn hynny, bu’n gweithio yn y diwydiant hysbysebu fel Cyfrifydd Rheoli. Y tu allan i’r gwaith, mae Suman yn fam brysur i dri o blant ifanc.

Sarah Crawley

Sarah yw Cyfarwyddwr Barnardo’s Cymru. Derbyniodd ei haddysg ym Mhrifysgol Loughborough a Phrifysgol Coventry. Mae ganddi gefndir helaeth ym maes gofal cymdeithasol plant ac oedolion, gwasanaethau ymyrraeth gynnar i deuluoedd a phobl ifanc, adfywio cymunedol, tai ac ailsefydlu troseddwyr, a bu’n uwch-swyddog mewn nifer o awdurdodau lleol yng Nghymru a Lloegr. Mae ganddi ddiddordeb byw mewn gwella gwasanaethau i holl blant, pobl ifanc a theuluoedd Cymru trwy bartneriaethau amlasiantaeth.

Deborah Jones

Mae Deborah yn Brif Swyddog Gweithredol Lleisiau o Ofal Cymru (VFCC) ac mae ganddi brofiad helaeth fel ymddiriedolwr yn y trydydd sector.

Yn ogystal â Plant yng Nghymru, mae Deborah hefyd yn un o ymddiriedolwyr 5 gwlad 1 llais (cadeirydd) ac yn cyflawni rôl Ysgrifenyddiaeth i Grŵp Hollbleidiol Llywodraeth Cymru ar Blant a Phobl Ifanc. Bu Deborah yn astudio ar gyfer MBA a Diploma mewn Cwnsela ac mae ganddi hanes hir o weithio gyda’r gymuned sydd â phrofiad o ofal.

Deborah oedd cynrychiolydd cyfreithiol VFCC yn “Ymchwiliad Gogledd Cymru” a bu’n arwain y gwaith o bwyso am newid go iawn o ran arddel hawliau’r gymuned ofal yng Nghymru, yn unol â CCUHP.

Jenny Williams

Ers 2014 mae Jenny wedi bod yn Gyfarwyddwr Strategol Gofal Cymdeithasol a Gwasanaethau Addysg Cyngor Bwrdeistref Sirol Conwy, ar ôl gweithio’n flaenorol fel Pennaeth Gwasanaethau Plant ac yna’n Gyfarwyddwr Gwasanaethau Cymdeithasol. Dechreuodd Jenny, sy’n Weithiwr Cymdeithasol cymwysedig, ei gyrfa mewn amrywiaeth o swyddi, gan arbenigo yn bennaf mewn Mabwysiadu a Phlant sy’n Derbyn Gofal.

Ar lefel genedlaethol, mae Jenny wedi cadeirio Grŵp Polisi Diogelu cenedlaethol Cymdeithas Cyfarwyddwr Gwasanaethau Cymdeithasol Cymru (ADSSC), wedi bod yn aelod o Grŵp Cydlynu Strategol Ymgyrch Pallial, hi oedd Llywydd Cymdeithas y Cyfarwyddwyr Gwasanaethau Cymdeithasol yn 2018/19 a hi yw cadeirydd presennol Bwrdd Diogelu Plant Gogledd Cymru.

Liam Maguire

Graddiodd Liam gyda gradd yn y Gyfraith o Abertawe, cafodd ei gomisiynu o’r Academi Filwrol Frenhinol yn Sandhurst, a daeth yn Gapten Milwyr Troed yng Nghatrawd y Cymru Brenhinol. Ar ôl arwain ei Blatŵn yn Affganistan, gadawodd y fyddin i reoli cartrefi plant am gyfnod o ryw 6 blynedd, gan gynnwys Hillside, sef yr unig ganolfan ddiogel i blant yng Nghymru.
Ers hynny mae Liam wedi bod yn Bennaeth Gweithrediadau ac yn Ymgynghorydd ar Reoli Newid ar gyfer yr elusen Home Start Cymru, ac yn helpu i gefnogi teuluoedd ledled Cymru i roi’r dechrau gorau mewn bywyd i’w plant. Ar hyn o bryd mae Liam yn gweithio fel Hyfforddwr Rheoli Arweinyddiaeth gyda Chymdeithas Tai o’r enw Valleys to Coast sy’n helpu i ddarparu cartrefi o safon i deuluoedd a phlant. Mae Liam hefyd yn ymddiriedolwr yn Home Start Cymru a Spectacle Theatre.
Mae Liam yn ymroddedig i sicrhau effaith gadarnhaol mor eang â phosib ar gynifer o blant â phosib, ac mae’n credu na fydd dim yn dod â mwy o fudd i gymdeithas na’u helpu i gyflawni hyd eithaf eu potensial.
Mae ei ddiddordebau yn cynnwys seicoleg, hawliau plant, diogelu, addysg, datblygu, ac unrhyw ddeddfwriaeth a rheoliadau perthnasol. Mae ganddo deimladau angerddol hefyd ynghylch rheoli arweinyddiaeth, diwylliant, strategaeth, gwasanaeth cyhoeddus, y trydydd sector a gwleidyddiaeth yn gyffredinol.

Athro Euan Hails

Mae'r Athro Euan Hails yn Gyfarwyddwr Llywodraethu Clinigol a Therapiwtig Adferiad, mae'n Nyrs Ymgynghorol CAMHS a DECLO ym Mwrdd Iechyd Prifysgol Aneurin Bevan, yn Athro Gwadd Prifysgol De Cymru ac yn Athro Cyswllt Ysgol Feddygol Prifysgol Abertawe.

Mae wedi treulio'i yrfa yn helpu'r rheini mewn angen, a chwaraeodd rhan flaenllaw yn natblygiad gwasanaethau Seicosis Ymyrryd yn Gynnar a gwasanaethau iechyd meddwl plant a phobl ifanc yng Nghymru. Gwobrwywyd ef ag MBE am y gwaith hwn.

Bu'r Athro Hails yn rhan o Hafal fel Ymddiriedolwr a Dirprwy Gadeirydd cyn dod yn Gyfarwyddwr Adferiad lle mae wedi helpu i ddatblygu llywodraethiant, ac wedi siapio a nodi gwasanaethau clinigol, therapiwtig a seicolegol. Mae wedi cefnogi'r Prif Weithredwr ac wedi cynrychioli Adferiad mewn digwyddiadau a melinau trafod ar lefel llywodraethol, lleol a chenedlaethol. Mae wedi hyfforddi gweithwyr y GIG, staff ac aelodau o Adferiad ledled Cymru a'r DU mewn ymyriadau seicogymdeithasol a therapi seicolegol sy'n seiliedig ar dystiolaeth.

Mae Euan yn Ysgolhaig Florence Nightingale, yn eistedd ar Bwyllgor Polisi Plant yng Nghymru, yn Gymrawd a Chadeirydd y Cyngor Seicotherapyddion Integreiddiol Cenedlaethol, ac yn Gymrawd Rhwydwaith Cwnsela mewn Carchardai a Chomisiwn Bevan. Daeth yn ail yng nghystadleuaeth Nyrs Iechyd Meddwl y Nursing Times yn 2020. Mae'n seicotherapydd a goruchwyliwr achrededig.

Katie Simmons

Mae Katie Simmons yn Ymarferydd Cyfranogiad Gweithredu Cymdeithasol Ieuenctid yn Hosbis Plant Tŷ Hafan yn Sili. Mae Tŷ Hafan yn cefnogi amrywiaeth o bobl ifanc, o blentyn a gyfeiriwyd sy'n mynychu'r hosbis, brawd/chwaer i blentyn a gyfeiriwyd neu frawd/chwaer sy'n galaru. Mae oedran y plant yn amrywio o enedigaeth i 19 oed. Mae rôl Katie yn cynnwys gwrando ar lais pobl ifanc a'u helpu i weithredu ar faterion sydd o bwys iddyn nhw. Mae hi'n darparu man diogel iddyn nhw siarad am faterion pwysig, yn cynnal dadleuon, sefydlu digwyddiadau codi ymwybyddiaeth ac yn rhan weithredol o'r gymuned leol.

Meddai Katie: ‘Rydw i wrth fy modd yn cefnogi plant i wneud iddyn nhw deimlo wedi'u grymuso a bod rhywun yn gwrando arnyn nhw. Mae sicrhau eu bod nhw'n ymwybodol o'u hawliau a'u helpu i fynd i'r afael â materion yn bwerus iawn. Fel mam, siaradwr Cymraeg rhugl ac athrawes ysgol gynradd brofiadol ers dros 20 mlynedd, rydw i wir yn gobeithio y gallaf ddod a'm gwybodaeth a'm hangerdd i Fwrdd Ymddiriedolwyr Plant yng Nghymru.’

Helal Uddin

Mae Helal yn teimlo'n ffodus bod ganddo brofiad mewn gwahanol sectorau. Mae ganddo brofiad o weithio mewn diwydiannau fel arlwyo / mecaneg cerbydau / diogelwch / siop groser a chigydd / canolfan alwadau / gwerthiannau o ddrws i ddrws / cyfiawnder ieuenctid / yr Adran Gwaith a Phensiynau ac ati.

Meddai: ‘Rwy'n ffodus i fod yn rhan o dîm a sefydlodd Tîm Cymorth Lleiafrifoedd Ethnig ac Ieuenctid Cymru (EYST Wales) yn 2005, ac rwyf bellach yn gyd-gyfarwyddwr yn y sefydliad.

Rwy'n angerddol dros greu Cymru well a byd gwell. Rwy'n mwynhau bob math o her a'r buddiannau a ddaw yn sgil yr her honno. Rwy'n lwcus i fod yn y rôl hon yn gwasanaethu cymunedau Du, Asiaidd ac Ethnig Lleiafrifol a phobl Cymru, ac yn chwarae fy rhan i sicrhau cymdeithas well i bawb. Rwyf wrth fy modd yn gweithio tuag at greu Cymru well. Rwy'n caru ein gwahaniaethau o ran amrywiaeth / gwybodaeth / profiad / traddodiad / diwylliant / bwyd / iaith / cod gwisg ac ati, sy'n ategu ei gilydd a chymdeithas.

Rwy'n credu'n gryf nad yw un bod dynol yn well na'r llall, ac eithrio drwy dduwioldeb, gweithredoedd da, caredigrwydd, bob math o weithgarwch elusennol y mae'n bosibl i rywun ei gyflawni, dadlau dros yr hyn sy'n iawn, a brwydro yn erbyn anghyfiawnder, anghydraddoldeb a thlodi.’

Huw Perry

Nirushan Sudarsan